Uroonkologiya
Uro-onkoloji cərrahiyyə həkimin əsas ixtisas sahələrindən biridir. Yanaşma iki prinsip üzərində qurulur: mərhələli və dəqiq diaqnostika, mümkün olan hər halda orqanqoruyucu cərrahiyyə.
Son yenilənmə:
Mərhələli diaqnostika
1. İlkin qiymətləndirmə
Şikayət, risk amilləri, fiziki müayinə, sidik analizi və ultrasəs. Sidikdə qan həmişə ciddi qiymətləndirilir.
2. Görüntüləmə
Kompüter tomoqrafiya, MRT və lazım gəldikdə kontrastlı uroqrafiya ilə şişin yerləşməsi və yayılması dəqiqləşdirilir.
3. Doğrulama
Şübhə qaldıqda endoskopik baxış və ya biopsiya. Prostatda MRT-ultrasəs füzyon biopsiyası daha yüksək diaqnostik dəqiqlik verir.
Cərrahi istiqamətlər
Böyrək şişi
Şişin ölçüsü və yerləşməsi imkan verdikdə yalnız şişin çıxarılması (rezeksiya) üstün tutulur; mümkün olmadıqda laparoskopik və ya robotik radikal nefrektomiya.
Prostat xərçəngi
Müalicə mərhələdən və risk qrupundan asılıdır: aşağı riskli xəstəlikdə aktiv izləmə, metastaz verməmiş xəstəlikdə radikal prostatektomiya (laparoskopik və ya robotik) və ya şüa terapiyası, yayılmış xəstəlikdə dərman müalicəsi. Qərar xəstə ilə birlikdə, fərdi verilir.
Sidik kisəsi xərçəngi
Sidikdə gözlə görünən qan — ağrı olmasa və bir dəfə baş versə belə — hər zaman uroloji müayinə tələb edir. İlkin addım sidik analizi və ultrasəsdir, lakin yalnız bu iki müayinə ilə sidik kisəsi xərçəngini istisna etmək mümkün deyil: sistoskopiya (sidik kisəsinə daxildən kamera ilə baxış) və yuxarı sidik yollarının görüntülənməsi (KT-uroqrafiya) tələb oluna bilər. Müalicə şişin dərinliyindən və mərhələsindən asılıdır. Şiş sidik kisəsinin əzələ qatına keçməyibsə, sistoskopiya ilə transuretral rezeksiya (TUR) aparılır, risk qrupundan asılı olaraq sidik kisəsinə dərman yeridilməsi (instillyasiya) ilə tamamlana bilər və təkrarlanma ehtimalına görə müntəzəm nəzarət lazımdır; əzələ qatına keçibsə, adətən radikal sistektomiya (sidik kisəsinin tam çıxarılması) kimi daha geniş həcmli müalicə tələb olunur. Müalicə planı mərhələyə və xəstənin ümumi vəziyyətinə görə fərdi seçilir.
Yuxarı sidik yolu şişləri
Sidik axarı və böyrək ləyəni şişləri nadir olsa da, sidikdə qan ilə özünü göstərə bilər və eyni izlənmə prinsiplərini tələb edir.
Onkoloji müalicə planı çoxşaxəli qərar tələb edir və heç bir internet mətni fərdi müalicə planını əvəz edə bilməz. Şiş şübhəsi varsa, vaxt itirmədən həkimə müraciət edin.